Kay kimsa urkukunaka kanmi: Pullaluma, Ramusluma, Akakanaluma, paykunaka tukuykunami kuchayukkuna. Shinami paykunaka shuk Kuri Chuchita kichunakushpa makanakun. Pichka watakamaka Kuri Chuchita Pullalumapimi kawsashka. Ñami rikuypika kay chuchika yaku muyuntintami imallatapash maskashpa tispirishpa kawsak kashka.
Wakinpika ñanman llukshishpa rikurin kashka. Shinapash wakinpika chawpi kuchapi wanpushpa purik kashka. Chashna yakupi ukukta chinkarishpa kutin shinallatak llukshirishpa sumakta kawsak kashka.
Chay Kuri Chuchi Pullakuchapi kakpirak tukuy Sarakuru runakuna, Tenta runakuna charik kashkakuna: wakrayukkuna, allpayukkuna karka. Shinapash kay Chuchitaka Ramus kuchami kichushka. Chaypimi kunankama purikta rikushkakuna.
Chaymanta Ramus (Nombre en castellano: Ramos) kuchaka manarak Chuchita Pulla kuchamanta kichushpaka, manchanayay millaymi kashka. Shina kashpami Sarakuru runakunataka shuk puncha shuk Sarakuru warmika wakrakunawan chayta yallikushpa achka yakunaywan kashpa, uchilla mankata hapishpa chay kuchapi wishinkapak rishka. Ñapash pay chayman chayakpika, kuchaka chakirishkallami. Shinami shuk asha yaku wakarikushka.
Chaymantaka tukuy kuchami sacha pankalla kashka karka chay warmipak rikuypika.
Shinapash chay warmika yakuta wishinkapak uriyashkallatakmi ancha yakunaywan kashpa, kucha yaku tiyana ukuman.
Ñapash chay kucha sapipi shayarikrikukpika, ¡wak! Nishpa yakuka huntamushkallami, ashallamantami warmitaka mana yaku killpashka, shinapash shuk chakillatami hukuyachishka.
Chashnallatakmi ishkay Sarakuru runakunata, chay kuchu kuchata yallikukpi, chashna tamya tukushpa, yakuka paykunata katishka. Chaymantaka aychapi chinkarinkakama waykuyachishka, shina paykunaka shuk chukllaman yaykushpa kishpirishkakuna.
Chashnami millay karka chay kuchaka, Sarakuru, Akakana runakunawanka manarak Kuri Chuchita kichushpa.
Kunanka ña Ramus kuchaka Kuri Chuchita Pulla kuchaka kichushkamantami kushilla, shinapash payka mana allitakchu runakunawanka, piñarakmi Kuri Chuchita kichunka yuyashpa.
Ramus kuchapi chay Kuri Chuchi kawsashkamantami, Pichik runakunaka, Kañar runakunapash ashka charikkuna, wakrayukkuna, allpayukkuna, kullkiyukkuna.
Kay Chuchita kichunka raykumi Pulla kuchawan Akakana kuchawan, ishkantin tukushpa Ramus kuchataka achkata umata nanachin. Chaymantapashmi Akakana runakunaka killa runakuna; Inkapirka runakunapash kaykunami tukuylla wakchakuna, kunankaman. Chay urkukunaka, makanakushpa kawsankuna; maykanpashchari Kuri Chuchitaka apanka.